Агаарын бохирдлыг бууруулахад хамгийн чухал аргуудын нэг арга бол нүүрс түлэхээс татгалзан, цахилгаан халаагуур ашиглаж халаалтаа шийдэх юм. Учир нь aгаарын бохирдлын эх үүсвэрийн 70-80% нь гэр хорооллын зуухны шаталтаас үүдэлтэй байдаг. Нийслэлийн хэмжээнд нийт 411420 айл өрхийн 48.4% нь төвлөрсөн дулааны шугамд холбогдсон бол 49% нь нүүрсээр галладаг зуух болон хувийн уурын зуухаар ​​халаалтаа шийдэж байна. Үүний зөвхөн 2.6% буюу 10514 өрх гэртээ цахилгаан халаагуур хэрэглэж байна.

Нэг өрх хүйтний улиралд 3-4 тонн шахмал түлш хэрэглэдэг бөгөөд энэ нь 400-500 мянган төгрөг юм. Харин халаалтаа цахилгааны эх үүсвэрээр шийдсэн айл хүйтний улирлыг дунджаар 200-300 мянган төгрөгийн зардал гаргаж хэмнэх боломжтой. Өөрөөр хэлбэл, таван ханатай монгол гэрт хэт ягаан туяаны шалны халаалт тавиулахад 450 мянган төгрөг болох бөгөөд цахилгааны сарын төлбөр хэрэглээнээсээ хамаарч, 70-90 мянган төгрөгийн хооронд хэлбэлзэх аж. Харин 30 м.кв талбайтай байшинд шалны халаагуур тавихад дунджаар 650 мянган төгрөг зарцуулах бөгөөд цахилгааны төлбөр сардаа 90-100 мянган төгрөг гарах тооцоотой. Ингэснээр өрхийн зардлаа хоёр дахин хэмнээд зогсохгүй эдийн засаг, эрүүл мэндээ ч хамгаалах боломж бүрдэж байгаа.